قاپانچی حسن جاوانلیقدا گئتدی ائلچی لیگه.قیزین دده سی سورشدو:
حسن ایشون نه دی؟ حسن دئدی:منیم ایشیم اوقدر اونملی دیر دئمه لی دویور!
کیشی دئدی:ژاندارم سان؟
حسن دئدی:گئت اوسته.
کیشی سوروشدو:ژاندارم لارین باشچی سی سان؟
حسن دئدی گئت اوسته.
کیشی قورخا قورخا دئدی: اوستانین والی سی سن؟
حسن گوله گوله دئدی :گئت اوسته!!!
کیشی دئدی: وکیل - وزیر سن؟؟
حسن دئدی قالخ اوسته.
کیشی دئدی :اولمیا شاه سان؟
حسن دئدی قالخ اوسته.
کیشی دئدی :آخی شاه دا سورا هئچ زاد دی..!
حسن گوله گوله دئدی :ووردون خالا ائله من هئچ زادام...
کیشی گولومسه دی و دئدی:منده سنه بیر قیز وئره جه یم اوزووه لایق...گئتدی آنباردان بیر یئکه آغاج گتیردی دوشدو حسنین جانینا ..آز ووردو , شیرین ووردو . سونرا سوروشدو نه ایستیسن بویور خیدمتینده یم.
حسن قول قابیرقاسین اووکالادی , دئدی:(( هئچ زاد ))
کیشی دئدی: ایندی یئتیشدون ایسته دیگیوه بویور گئت...!!
قاپانچی حسن گئتدی حاماما؛ کیسه چکن دئدی:کیسه چکیم؟حسن دئدی چوخ قشه دئدین, چک.
لیف چکن گلدی :لیف چکیم؟ حسن دئدی:نه مانع وار, چک !
انجیر گلاب ساتان دئدی:انجیر گلاب یئییسن؟ حسن دئدی: چوخ گوزل دانیشیسان, وئر.!
چای ساتان دئدی:چای وئریم؟
حسن دئدی :هئچ سن دن یاخجی دانیشان یوخدو وئر.
قطفه چی گلدی :قورولانیسان؟ فیطه وئریم یا قطفه ؟
حسن دئدی :گوزل دانیشدون , سن دن اولماز هر ایکی سین.
چیخاندا حامامچی دئدی:عمی شوتون ائله دی اون مین تومن.
حسن عمی باشین سالدی آشاغا.
حامامچی دئدی:((دئیه سن عمی هئچ پولون یوخدو ؟؟؟))
حسن عمی گوله گوله دئدی : هامی دان گوزل بوگون سن دانیشدون...!!!
کئچر بو گون لر....!!
اَسکی چاغ لاردا زنگانین یام یاشیل کندلری نین بیرین ده بیر باجی قارداش یاشاییر دیلار .آتا آنالارین اَلدن وئرن باجی قارداشین آللاه دان باشقا کیمسه لری یوخ ایدی.قارداش باجی سیندان یئددی یاش بؤیوک اولدوغونا گؤره یئتیم قالان دان بری ,باجی سینی بؤیودوب اونو یاخشی بیر جهازلا بخت ائوینه گؤندرمک قرارینا گلیر.
اوزون ایللر بویو اربابین تارلا لارین دا(مزرعه لرین ده)آغیر زحمت لره قاتلانیب چالیشان قارداش اؤز ائولنمه واختی نین سووشدوغونا باخمایاراق ,بیرجه باجی سینی خوشبخت ائله مه یه جان آتاردی .ایللر آیلار گلیب کئچیر بالا باجی ایسه قارداشی نین اَمه یی ایله(زحمتی ایله) بؤیویه رک گوزل له شیب اَرلیک بیر قیزا چئوریلیر.ائلچی لرینین آراسیندا ,نهایت کندین وارلی - کارلی هامپالارین دان اولان بیر کیشی یه گئدیر.دده ائوین ده قارا گونلر گؤروب کورلوق چکن باجی ,غئیرتلی قارداش کؤلگه سینده اَر ائوین ده گونه چیخاراق ,بختور اولور.
قارداشی ایسه خیالی بیرجه باجی سیندان راحات اولونجا ائولنمک قرارینا گلیر,آنجاق یاشی اؤتوب ارزو قیریشیب ساچلاری آغاران قارداش ,سئودیگی قیزلاری ,اونو بینمه دیک لرینه گؤره آلا بیلمیر. خئیلک گزیب آختاردیق دان سونرا قونشو کندین یوخسول بیر عایله سینده یاشایان ,آخسار بیر قیزلا ائوله نیب ,بَی لیک پالتاری گئییر.آتابابا دان قالما یئر- یوردو اولمایان قارداش ,ارباب اؤلوب گئدن دن سونرا اوزگه لرین یئر-یوردوندا بیر ایشچی کیمی ایشله مک زوروندا قالیر.بو اؤزدن یوخسول قارداشین عایله سی نین دورومو قارا گون لر له کئچردی .بیر ایل قوراقلیغ (خشکسالی)دوشور,ائله کی قارین دویورما چتین بیر ایشه چئوریلیر.
بئله بیر آغیر وضعیت ده آج عایله سینی دویورماغا باشقا چاره تاپمادیغینا گوره ,وارلی باجی سینین ائوینه گئدیب اوندان یاردیم ایسته مک قرارینا گلیر!قاپینی چالاراق یاآللاه دئیه ایچه ری گیریر. ساج اوستونده چؤرک یاپماغا مشغول اولان باجی ایسه قارداشینی گورونجه هؤیول یئرین دن قالخیب ,تازا ساج دان اندیرمیش داغ چورک لرین اوستون ده اوتورور!! بئله بیر حرکتی گوروب ,دونوخان قارداش ,باجی سینین نیتینی (منظورون)آنلاییب و داغ چورک لر اوستونده اوتوران باجیسینا دئدی:
باغچادا گول لر باجی
اوخور بولبول لر باجی
یانینی کوماج یاندیریر
کئچر بو گونلر باجی
اَسکی:قدیم—چاغ:زامان—کوماج:بیر جور چؤرک—هامپا:خرده مالک